本文重點
銀行家一向以人工高福利好見稱，不過內地銀行家都係「公務員」，無歐美銀行家薪酬咁惹民憤之餘，仲連假都唔得閒放。建行公關及企業文化部總經理胡昌苗同絲絲講，佢已經幾年無放過年假，不過佢哋係無得儲起假期嚟用，亦無得「補水」。以胡總一年十幾日年假計，幾十日假期就咁無咗，如果係一般打工仔一定心痛死，不過胡總只係輕輕講咗句，有公事在身無得計。真係模範員工。
不過好在內地銀行一般假期都唔少，胡總春節都放咗一個星期假，佢話趁放假去咗哈爾濱旅行，天氣好凍，最暖嘅時候都係得零下8度，不過室內就好暖，反而話香港好有趣，因為香港無暖氣，隨時室內凍過室外。
春節吸存款瞄準利是
胡總仲同絲絲講，其實建行有一半分行喺農曆新年都會繼續營業，因為啲人
完利是，要將啲利是錢存入銀行，睇嚟建行吸存款真係非常進取，但係亦唔會對員工做好過分嘅「無理要求」，因為農曆新年時同事都會用輪更制，亦會有比平時更高嘅人工畀加班費，算係非常體貼。
余絲韻