每人身家暴漲200萬

平保股價尋日報44.61元（人民幣，下同），呢批8.59億股股份依家值383億，由約1.9萬個員工持有，粗略一計每人身家已勁升200萬以上，雖然話每年唔可以沽多過30%股份，不過話唔定過多幾年，賺得仲盡呢。

呢批員工中，包括董事長馬明哲在內嘅15個高層管理人員，根據平保中期年報，馬明哲同埋副董事長孫建一，透過三家公司持有嘅平安A股相當可觀，有人估計價值數以億計。

相反平安銀行嘅員工股就頭痕啲，據內地傳媒話，依家一班員工積極討論套現嘅方法，平保入股深發展就係一個契機，建議包括買咗深發展之後賣咗平安銀行，呢個可能性就低啲，但係依家就傳緊興業銀行有意接洽。或者兩家銀行合併，咁樣佢哋就可以透過換股套現。另一方法就係直接換股，五股平安銀行換一股深發展，之後佢哋就可以喺市場上面沽。仲有其他意見係希望平安銀行獨立上市、平保回購股份等等。

平安銀行嘅員工股都係之前平保收購平安銀行前身深圳市商業銀行嗰陣遺留下嘅問題，姑勿論最終套現方法係點，相信佢哋都會好似平保啲員工咁賺到笑。

余絲韻