內銀股一直傳要供股增資，傳足兩個幾月後，終於出現兩間先頭部隊，交行（03328）及招行（03968）率先宣布供股，消息傳出後，股價走勢遠較預期中好，咁又係嘅，市場傳內銀股要集資，足足傳咗兩個月，而啲內銀股就跌足兩個月，現在明朗化，股價做番好啲亦合情合理。
科網股年代有隻神仙股，叫中信21世紀（00241），當年曾試過一個月內炒高7倍，本來中信集團希望注入一啲電訊業務，但其後因科網股爆煲而未能成事，結果一靜就靜咗十年。
去年十一月見佢又炒起過，市場估又係玩注資，今轉低位炒上後，喺高位收集咗成兩個月都唔肯回，走勢十分對辦。尋日突然又開車，市場估計注資一事好快落實。唔理佢堅定流，總之有勢跟炒番一轉，博佢破頂見2.4元，最多跌穿1.26元就止蝕囉。
古晨