投資篇 宜分散投資不同產品

莉莉：市場上嘅投資產品同啲化妝品一樣，隻隻功能都唔同，多到我哋都唔知點揀至好？以你嘅專業知識，成功嘅投資方案應該具備點嘅步驟呢？

Jessie：首先一定要了解現時個人嘅財政狀況，繼而諗清楚自己嘅投資目標回報和能夠承受風險嘅程度，最後才去決定投資咩產品和年期長短。分散投資等於分散風險，當中大家可選擇投資不同國家、不同行業、不同產品，而不同產品就可包括股票、債券、外幣和基金等。

高妹：股市好似過山車咁，股友好容易因跌市輸錢而令情緒不安，有時我同莉莉落去證券行，見到啲股友「苦瓜乾」嘅面口，個心都好難受呀。

Jessie：當一個人嘅情緒不安時，就會影響佢嘅情緒智商，令犯錯機會大大增加。舉例，當你投資一萬元，輸咗十元時，你會覺得無咩所謂；但當你投資一萬元，輸咗一萬元時，你就會覺得好緊張或者唔開心。當一般散戶將大部分嘅資金都投放喺單一嘅股票時，其實就好似賭錢咁，較易會一鋪清袋，所以學識分散投資好重要。

藍籌股未必可長揸

莉莉：二月頭港股鬼咁波幅，外圍壞消息好似塊面生暗瘡咁，生極都唔完，藍籌股同細價股同樣面臨大跌命運。對於投資股票，你又有咩獨門技法？

Jessie：一句講晒，改變自己嘅投資心態。事實上，經過○八年金融危機之後，大家嘅投資心態已經有所改變，會明白一個道理，就係藍籌股都未必可以長揸。至於細價股，我一般唔會提議人哋去買，因為投機性質比較重。

美容篇 股票護膚品最緊要啱

高妹：講真，股海時不時就翻起巨浪，令到我同啲股友嘅壓力都好大，你有無啲美容減壓方法可以介紹吓？

Jessie：做SPA啦，我好鍾意㗎，差唔多日日都會響屋企做嘅。另外，就係去按摩，減壓之餘，又可以減肥。

莉莉：作為美貌與智慧並重嘅港姐，知你喺美容上嘅知識好豐富，其實扮靚同投資有無共通點呢？

Jessie：扮靚同投資都一樣，第一步要建立了「相信」嘅基礎，然後先作出「行動」。要記住：世界上最貴嘅護膚品就係自己「買錯咗嘅護膚品」，而世界上最貴嘅股票，就係你「買錯嘅股票」。因此，大家買嘢時，一定要因應經濟能力同需求去買，對症下藥先係致勝辦法呀。

高妹：哈哈，你知啦，股友買股票輸咗錢時，個面口都會「乸埋一舊」，唔知有咩mask可以敷吓呢？

Jessie：哈哈，我平時會用美白、補濕和潔淨三大功能嘅面膜，每日輪住咁用，皮膚先會好㗎。其實，平時做投資嘅壓力咁大，除咗敷面膜，大家都應該食多啲維他命，去增強身體嘅抵抗力，好似食維他命B可以促進人體嘅新陳代謝，維他命C就可以中和毒素，仲有美白同抗氧化嘅作用。另外食鈣片都好好，特別係女仔，由25歲就開始要食啦，可以強健骨骼。好似買股票前，都要先做好功課，好過輸咗錢之後，先醒起要去補習啦。

買股票要獨立思考

高妹：等我都即刻去買番啲面膜敷敷先。係啦，想扮靚就可以問你，當股友想問人拎股票貼士時，最好又問邊個呢？

Jessie：其實投資最重要係有個人嘅獨立思考，千萬唔好搵啲專家，因為「專家」嘅意思，即係專門點你咁解。總之，投資機會日日都有，大家唔好心急啦。

雖然上個星期啲天氣平均只得9至10度，但孖妹都好勤力呀，連續幾日都有落證券行同股友拜年。好似上周三港股第一日開市，孖妹就落咗中環耀才證券總行，當日恒指就紅盤高收265點，哈哈，可見孖妹腳頭都唔錯。

不過，耀才市務總監郭Sir就話：「呢排股友散戶採取觀望態度，恒指高開後又不敢高追，而且歐元區經濟問題仍未解決，估計後市會較為反覆。」

年初五嗰日，溫度仍然係9度左右，今次孖妹就去咗時富金融深水埗分行，點知我哋一行入去，就見到有散戶拎袋走人，問一問先知原來發生「跳fuse」事件，股友暫時無法即時查價。吓？應該唔關孖妹問題啩？

股友睇唔明後市

第一次落時富，股友好似都幾鍾意孖妹喎，因為大家除咗讚我哋靚之外，就係咁爭住問我哋拎貼士，哈哈。不過，講到股市看法，股友們就話：「睇唔明。」最後，有股友仲笑笑口話：「好多人去咗旅行未返呀，你哋下個星期再嚟啦。等我到時恤靚個髮型，再同你哋做訪問啦。」

虎年你最看好哪類資產的表現？

深受讀者歡迎嘅《東方產經》網上民意調查，今期嘅問題係，甫踏入虎年，港股及金價首日雙雙報升，咁你最睇好邊類型嘅資產表現呢？截至上周末晚上6時，話「股票」有51.6%，話「物業」有17.1%，話「黃金」有17.5%，話「外幣」有7.3%，話「債券」有2.0%，而話「其他」就有4.5%。

高妹、莉莉

若有料報畀高妹同莉莉或有嘢問，可電郵money.biz@opg.com.hk