港股愈來愈難炒，波幅往往較其他市場為大，好似上周五，亞太區股市本來只係輕微跌一跌去回應美國加貼現窗利率，點知港股一跌就五舊水，嚇到左鄰右里齊齊跟跌。結果美股話你知，係港股表錯情，今日會唔會當無事發生又踢番上去，就真係天曉得。但日日咁震法，真係膽汁少啲都唔敢落場。
內地積極整頓產能過剩問題，企業展開淘汰賽，可以留低就做大做強。內地剛落實紡織工業振興規劃，講明弱者今年無得留低，炒友應該努力找尋行業中嘅強者。
互太紡織（01382）喺關鍵時刻宣布派發0.22元特別股息，分明係信心同實力嘅表現，加上紡織業前景漸改善，公司未來應可維持高息政策。近期大市調整，見互太都唔多願跌，一於買少少，博佢爆上7元，止蝕位就定4.5元。
古晨