現貨場成交額略增至428億元，依然較為淡靜，但期貨場交投活躍，兩個月成交合約逾8萬張，古勝相信係期指大幅波動，令交投增加。

本地魚缸可跳彈床

不過，上周五花旗公布的通脹數字溫和，加上「伯哥」大派定心丸，保證短期內「息魔」唔會復出，花旗魚缸低開後，逐步收復失地，三大指數最終倒升散場，本地魚缸在花旗掛牌的ADR回升，相信今日本地魚缸可跳彈床，恒指可重返二萬點之上。

古勝認為上周五本地魚缸急挫，係缸邊友反應過敏，加上現貨場成交極為奀豬，令淡友有機可乘，刻意踩多腳，故此本地魚缸當時有跌過龍之嫌。

今日本地魚缸彈力有幾強，要視乎祖國魚缸能否紅盤高高掛，春節假期前，人行突調高存款準備金率，難免對祖國魚缸走勢有所影響。幸而調高存款準備金率一事，已事隔個多星期，在下相信內地缸邊友對此已消化得七七八八，殺傷力大大減低。而且祖國在春節假期，零售業丁財兩旺，對祖國魚缸應有一定支持。

呢個星期四，又係本地魚缸期貨場結算，魚缸波動難免，若然散戶多資金流入做淡，唔排除大戶乘機懲戒淡友。

上周在加息陰影籠罩下，本地地主一度成為淡友狙擊對象，但「三兄弟檔口」（00016）推出元朗新盤，不但呎價高達逾5,000元一平方呎，更賣個滿堂紅，多得本地錢莊又掀按揭減價戰。

力爭成為龍頭銀行

中銀香港（02388）一直係本地樓按市場一哥，隨着人行指定中銀香港為跨境人仔貿易結算唯一清算行後，中銀爭取成為香江特區內龍頭銀行的目標更易達成。尤其祖國面對人仔的升值壓力，祖國未來將持續放寬外匯管制措施，中銀發展祖國業務市場有一定競爭優勢。

中銀有阿媽中行（03988）咁大個靠山，當北大人進一步開放人仔業務時，有助集團的貸款及非利息收入維持理想增長。以現價計，中銀的股息率逾4厘，一級資本比率高達11.4%，具有一定防守性，現價屬超值，可中長線睇好。短炒則視乎大市走勢，博反彈見好即收。

古勝