本文重點
尋日虎年港股第一個交易日開市，港交所（00388）主席夏佳理同行政總裁李小加例牌主持新春股市開市儀式，絲絲見到兩人不約而同打了紅色領呔，加上隔夜美股做好，都估到會開出紅盤，結果真係不負兩人期望，港股高開三百幾點，兩人心情興奮，之後各人就持了一大疊利是派畀在場工作人員同出市代表等等。
夏佳理更自爆前日年初三賀歲馬發了新年財，雖然唔係自己隻馬跑出，佢有份嗰隻馬跑梗頸四，但佢買嘅其他馬就中了。自己發了新年財，佢亦不忘祝賀大家新一年心想事成同虎虎生威！
李小加北海道小休
至於李小加，由於尋日係佢第一次以行政總裁身份喺交易所派利是，就更加開心，面對鏡頭前更認真咁整理頭髮裝束。雖然佢面對記者提問有關人民幣產品時大耍太極，比喻發行有關產品就好似寫文章，要「慢慢寫、長期寫」，不能焦急，但提到農曆新年期間，去了北海道札幌小休兩天，就侃侃而談。
佢話札幌氣溫只有零下八度，雖然係咁凍，但佢都有滑雪玩番吓！札幌係香港人至愛嘅旅遊熱點之一，好多人去到都唔捨得走，咁佢點解只留兩日咁少，皆因要趕返來香港主持上市儀式！