24.5%股友早沽貨「收爐」
新曆二月四日立春，所以玄學上一早就送牛迎虎，有散戶開始埋單結算，將牛年嘅賺蝕加埋「蟹貨」計一計，發覺唔係賺好多，無晒心機就索性唔做年結。近排港股又唔爭氣，有幾多股友已疊埋心水「收爐」離場？據今期《東方產經》網上民意調查，截至上周末晚上6時，75.5%人仍作最後衝刺，沽貨離場嘅有24.5%，一於提早「收爐」。
事實上，仲有5日就過年，不如展望吓虎年大市，今期搵嚟塔羅占卜師「利時神婆」潘秋婷以及鑽研風水命理已20年嘅玄學風水師程仲蕎，幫港股測運。
塔羅占卜師 潘秋婷（利時神婆）
8月高峰 9月撞「死神」
利時神婆：二月份顯示咗張「風雪」牌，代表運勢唔好，可見近排股市好波動，有急瀉現象；三、四月份股市開始轉強，皆因有代表財運及收成嘅「五芒星」牌出現；去到八月份，出現咗塔羅之中嘅王牌——「世界」牌，恒指大有可能升穿去年最高位。不過，戲劇性嘅變化係九月份竟抽到「死神」牌，股市可能出現全年最大嘅跌幅，雖然唔會係長期急跌，但到時股民都要小心，至於十月至十二月份就比較平穩。
高妹：去年新股特別多，但潛咗水嘅亦唔少，我哋今年可以同新股拍吓散拖？
利時神婆：今年新股表現會比藍籌股好，因為佢抽到一張「權仗武士」，代表上進心，當中有啲新股表現仲會特別突出。至於內房股，出現嘅係「寶劍」二號牌，有深思熟慮及保守嘅意思，股友一定要做足功課兼小心謹慎先好買入。
內地退市料早於美國
高妹：市場擔心中國及美國退市將對經濟帶嚟負面影響，唔知塔羅牌測唔測到實際時間呢？
利時神婆：中國上半年出現好多「逆向」嘅牌，代表退市存於不安、曖昧嘅時期，去到十月先出現一張「命運之輪」，代表事件進入轉捩點，退市時間表會變得明確。至於美國，全年未有出現特別嘅牌，照我推斷，中國可能會較美國更早退市。
高妹：最近市傳有「大鱷」之名嘅索羅斯想來港設立辦事處，唔知件事係咪真呢？
利時神婆：呢張牌係正向「五芒星」嘅五號牌，唔係代表野心，反而有方向未明、尋覓中嘅意思。以成件事嚟講，現時索羅斯應該仲未決定辦事處嘅地點，仍然喺思考中兼搵緊出路嘅階段。
玄學風水師 程仲蕎
中資當旺 避買細價股
程師傅︰三元九運共180年，每運管20年，六四至○三年西方當運，但○四年後「八運」已轉移至東邊，由喜瑪拉雅山最高點起計，最旺嘅地方係東北位，中國大陸及韓國屬於財位，未來應朝北面買入中資股最賺錢。
莉莉︰喺虎年邊啲股份同我哋最合拍？
程師傳︰虎年流年當運之星「八白入中」，「八白」屬土，代表今年由一座「高山」管事，大市料只會平穩向上，升幅唔會太多。由於太歲壓土，想做贏家就要靠實力，有利投資於利土嘅股份，如港鐵（00066）、港燈（00002）、基建股、食品股以及公用事業相關股份。
莉莉︰咁港人愛股滙控（00005）又係咪可以長相廝守？
程師傳︰因立春八字，虎年有「金木對戰」迹象，代表有官非訴訟和破產，民生冇問題，經濟就面臨考驗，動盪不定。宜避之則吉嘅股份有屬金行業包括銀行、保險和汽車，股價容易大幅波動，滙控前景都唔好。而屬木行業如林木和醫藥業最為不利。仲有，不宜沾手嘅股份有細價股，因缺乏咗曾喺○七年出現嘅「自由之星」助陣；另外地產股，相比金融股雖然冇咁大風險，但因畀金洩氣和受木剋制，今年難有大升嘅表現，新曆三月六日「木旺之固」會有回落之象。
旺位布陣招財添人緣
莉莉︰要股場及情場兩得意，可以點樣布陣？
程師傳︰有兩個偏旺偏財嘅方位值得留意，第一，「六白武曲星」（即俗稱「偏財星」）會落入正東方，喺屋企正東方放八粒類似雞蛋咁大嘅白色石春，記住要用一個黑色四方碟盛載石春穩住財氣。第二，人脈對投資好緊要，西北方位係「九紫右弼星」所在地，代表吉慶和財星，喺嗰到擺放一個高身透明嘅花樽，放入清水和鮮花，再加八粒黃色石春，可以增強桃花人緣兼獲利。想過得甜甜蜜蜜，就要插兩支火百合或者九支剪咗刺嘅玫瑰花，分別代表成雙成對、長長久久，好意頭嘛，千祈唔好放劍蘭，「劍蘭見難」嘛。
莉莉︰嘩！家陣擺咗呢個桃花陣，可能未到大年初一已經搵到情人拍拖！咁股友應該搵邊類人嚟旺自己（尤其係要旺財）？
程師傳︰肥人和眼神足嘅人感覺較穩重，值得夥拍，但想最準確搵身邊旺人，一定要用自己八字睇六親關係。我只可以講邊類人今年投資會不利，就係生肖屬虎、猴和蛇，當中屬虎嘅朋友容易思想混淆，投資方向失準，想置業最好等新曆九月之後。
高妹、莉莉
若有料報畀高妹同莉莉或有嘢問，可電郵money.biz@opg.com.hk