本文重點
人民幣跨境貿易結算去年七月喺各方熱切期待下正式推出，只可惜進度緩慢，中央早前更對貿易結算嘅進度直表不滿，所以銀行公會亦唔敢怠慢，除咗透過旗下人民幣小組與人民銀行及金管局跟進，出任銀公主席只有個幾月嘅渣打香港行政總裁洪丕正亦主動向財爺提出，希望積極推動本港人民幣業務，佢總算交足功課。
銀公提建議增競爭力
洪丕正尋日主持銀公例會後話，銀公已向財政司司長就財政預算案遞交有關提升本港競爭力嘅建議，包括降低薪俸稅及利得稅稅率、爭取與更多國家建立雙邊稅務優惠協議、促進本港中介人業務以協助內企「走出去」等，當然唔少得推動人民幣業務發展咁重要嘅一環。
其實銀公之前已表明過好多次，希望拓展本港人民幣業務，除咗人民幣跨境貿易結算之外，增加本港人民幣流通量、加強人民幣貿易融資業務及開拓其他人民幣產品亦係銀公嘅目標。今次銀公選擇向港府「進諫」，相信係想政府喺呢方面提供更多協助。
余絲韻