本文重點
新世界發展（00017）主席鄭裕彤喺《福布斯》剛公布嘅香港富豪排名榜中排「梗頸四」，絲絲問佢明年能否打入三甲？彤叔只係一笑置之；不過，新世界員工就肯定好開心，因為彤叔開金口，好大聲咁宣布今年新世界員工肯定有人工加，真係飲得杯落。
彤叔雖然唔多清楚確實嘅加薪幅度，但就講到明一定加，相信旗下員工都可以過肥年。
其實，彤叔唔單只關心自己公司嘅員工，當問佢今年有乜嘢新年願望時，佢就好有心咁對廣大市民話：「最好香港人個個都有工做，社會安定繁榮，最緊要融洽。」
萬邦老股東冇口福
尋日係萬邦投資（00158）嘅周年股東會，萬邦班老股東就感到失望嘞，原因唔關大跌市事，而係冇靚嘢食。
萬邦有一班好忠心嘅股東，彤叔好識做，以前會將股東會時間安排喺中午，開完會就一齊食餐勁，甚至試過有鮑參翅肚食；但呢兩年所有公司都要節省成本，萬邦尋日就喺下晝3點開會，會後就冇乜驚喜，希望今年經濟繼續好，明年老股東可以再有魚翅「漱口」啦。
余絲韻