美股再升，港股亦再下一城，加上內地股市扭轉跌勢，帶動港股午後升幅擴大。詩詩無貨一身輕，可惜早段未敢衝動入市，見午後大市愈升愈有，只有靠邊站得個睇字。
大福證券（00665）成功出售股權後，股價翻一番，詩詩認為內地金融企業已瞄準本地證券行進行購併。根據過往內地金融機構收購本地同業的例子，通常收購作價至少達公司市帳率2倍，持有全牌照的英皇證券（00717）每股資產淨值為0.59元，現價市帳率1倍唔到，對於內地金融企業來說，可以話係一個平靚正筍盤。
集團曾於去年以每股0.42元批股集資，不過手貨大股東認購咗大部分，其餘亦只係批畀友好，完全無出過街。上月英證股份曾高見0.59元，之後大市回軟，其股價最低只係回落至0.47元，近日在0.5元之上窄幅橫行，雖然交投未見活躍，但有買盤密密收集，似乎要醞釀突破。詩詩呢個位買入，風險有限，最多輸一成，換一倍回報，條數點計都玩得過。
詩詩