中央次季加息最熱估
為咗幫班朋友，孖妹都搵咗啲資料，希望幫到大家嘅膊頭。輕微痛楚可以用退熱貼或暖水袋紓緩，或者多做運動鍛煉，增強肩膀和上臂肌肉，食止痛或消炎藥都得；痛咗成個禮拜就要搵物理治療師幫手，如果止唔到痛，可能要打針呢！所謂「病向淺中醫」，唔好一拖再拖，否則痛到瞓唔到覺就弊喇。
講番個市，近期市場最多人議論係到底中央會幾時加息，據今期《東方產經》網上民意調查，截至上周末晚上6時，最多人（39.7%）預計內地會喺第二季加息，估計喺第一季、第三季及第四季加息嘅分別有26.1%、19.6%及14.6%。事實上，喺通脹預期升溫下，阿爺收緊銀根，理應只會短暫打擊內銀股，唔影響銀行長期業務，可惜上周「七行」都跌到3個月以嚟嘅低位，跌得最多係中信行（00998），但趁低為內銀股平反嘅仍大有人在，以下三位仁兄就係表表者。
郭思治捧龍頭「三行」
耀才證券市務總監郭思治（郭Sir）力撐話內銀股基本因素好，但股價前景仍要睇恒指表現，佢預料港股見底後，最先受到股友追捧嘅係中行（03988）。
高妹︰內銀股點解仲未有動力向上衝？
郭Sir︰部分原因係期指相關活動主導大市，內銀「三行」（工行（01398）、建行（00939）及中行）佔恒指比重20%，喺期指淡友狙擊下，恒指跌幅擴大，內銀股亦應聲倒下。依家恒指仲未擺脫試底形態，大市見底後內銀股才會見到曙光。
高妹︰咁幾時先係買入嘅最佳時機？
郭Sir︰去年新增貸款太多，家陣民間財富仲係天文數字，除咗環球資金流動性充裕外，仲有息口低企、企業盈利增長良好及經濟進入復甦勢頭這四大利好因素，可惜呢啲因素依家仲未反映出嚟，目前可以分段吸納內銀股作中長線投資，短期承擔嘅風險唔高。
高妹︰你嘅心水股係邊一隻呢？
郭Sir︰若以上四大利好因素唔變，恒指下跌至19,180點屬健康調整，第一站可上望25,000至26,000點。調整後應首選龍頭股「三行」，當中我鍾意建行多啲，初步目標價睇6.8元，中期上望「一蚊美金」（約7.8港元）。工行及中行嘅第一目標分別睇6.5元及4.4元，若升穿再睇7元和4.98元。
市場先生撈建行中信行
專門研究金融股兼係滙控（00005）忠實擁躉嘅「散戶Blog王」市場先生，近期就趁平買入建行及中信行，目前佢持有嘅內銀股資產值約107萬元。
莉莉︰你擔心中央今年加息會推低內銀股價嗎？
市場先生︰加息初期對內銀股其實有利，股價升幅都會快啲。由於銀行借出貸款嘅利潤高咗，就算生意少咗，都得到與加息前相同嘅利潤，「以價補量」係好事，而且借出去嘅錢少咗，亦可減少壞帳風險。不過加息加到某個程度就要小心，當企業頂唔住畀貴息，銀行分分鐘收唔番啲街數。
莉莉︰去年新增貸款咁多，萬一加息，對內銀股係咪好事？
市場先生︰國有銀行借出嘅貸款通常未咁快到期，加息對大銀行冇乜大關係；至於細銀行如招行（03968）及中信行，由於借出嘅貸款多屬短期，喺加息後新借嘅貸款可以「重新定價」，盈利因而飆升。而且我揀嘅中信行去年借錢雖然好進取，但貸款額度仍有限，唔擔心有壞帳。
莉莉︰你最撐嘅建行及中信行喺你買入之後再試低位，究竟買內銀股有乜嘢策略？
市場先生︰等到內銀股供股集資嘅消息一出，走勢仲會弱啲，所以我只會用八成資金買貨，其餘嘅資金預番嚟供股。我根據今年嘅盈利預期，建行及中信行預測市帳率分別係2.55倍及1.87倍，所以預料佢哋嘅股價今年可以分別升上7.8元及7.05元。
張小喬 吼建行Call輪
比聯金融股票衍生產品部董事張小喬（小喬）支持內銀窩輪，由於引伸波幅跌到兩年以嚟低位，有效槓桿高咗，減低開新倉成本和溢價，佢首選建行認購輪（Call輪）。
高妹︰近期資金流入邊隻內銀股Call輪多啲？
小喬︰當投資者買入認購輪，發行商會用場外期權做對沖，近三周內銀股場外期權需求多咗，反映多咗人買入內銀輪撈底，其中建行Call輪就有1.4億元資金淨流入，係市場第二大受歡迎嘅股份認購證。
莉莉︰究竟買邊啲內銀輪穩陣得嚟又有肉食？
小喬︰揀內銀輪有三大原則，分別係低街貨量、貼價輪和低時間值損耗，以低街貨量行先，然後要買貼價或者輕微價外證，可以買行使價係6.5元樓下嘅建行Call輪；最後睇到期日，內銀股唔係一、兩日就有得食胡，應該揀啲3至4個月到期嘅窩輪，時間值損耗少啲。
綜合各方意見，建行仍然係大部分人嘅心水，其餘六行亦各有千秋。中信行係「投機之選」，以近3個月高低位計算跌幅最大，大瀉28.26%，可以博反彈；交行（03328）係「另類選擇」，較少證券界撐場；中行就夠晒抵買，今年預測估值夠低。
高妹、莉莉
若有料報畀高妹同莉莉或有嘢問，可電郵money.biz@opg.com.hk