上周中，花旗魚缸插水，股市解畫佬將責任歸咎於聯儲局主席伯南克腳頭唔好，討好唔到班美國民主黨議員，隨時可能無得留低，星期五結果有驚無險，鬧完又畀佢做多四年，但花旗魚缸埋單一樣見紅，道指跌53點，收市報10,067點，個勢隨時見變番四位數字。祖國魚缸方面，上星期上證綜合指數跌穿被視為「鐵底」的3,000點關口，成交更加大縮水，滬深加埋試過唔夠900億人仔。
花旗魚缸恐有餘震
本地魚缸情況一樣唔多老利，上星期兩次試穿兩萬點，接近19,900點唔少心口掛住個勇字嘅散戶入場力頂，好友諗住即使再殺落去19,800點，排住隊被屠宰嘅牛牛經已唔多，大戶無必要咁勞民傷財。技術上，收市唔上番20,380點樓上，令古勝更擔心嘅係，花旗魚缸比中港兩個魚缸跌幅落後，今個星期有幾個大數據曝光，恐怕短期大市餘震未完。
不過炒股唔炒市，避開紅色地主及紅色錢莊等受收緊銀根影響嘅板塊，仲有唔少跌市奇葩可以留意，聯想（00992）上周五就見異動，抽高3.5%，升0.18元報收5.37元收市，調查機構IDC同佢計數，聯想第四季產品付運量增長高達四成二，比大孖沙估計嘅三至三成五高一截，滿地眼鏡碎片之餘，各大行亦紛紛改過佢哋份業績預測。
祖國電腦市場比歐美市場更早復甦，其實唔算意外，展望今年，一號文件確立對發展內需的支持，家電下鄉力度同規模都會再放大，聯想應是不愁生意，更值得留意嘅係柳傳志出山後，佢老人家一出手就向母公司買番手機業務。相信讀者們都有留意，已經越嚟越多人用智能手機，無論屋企定響街，都揸住部手機「篤篤吓」，手機同電腦嘅界線愈嚟愈模糊，假如堅持要電腦同手機兩門生意分開做，可以估計，聯想將來叻極有個譜。
智能手機前途無限
聯想今年第一炮係套用谷歌軟件系統，為內地幾間3G網絡生產WCDMA智能手機「樂phone」，聯想內部對此寄望極大，估計聯想手機未來銷量（目前每年7百至8百萬），會超越個人電腦銷量（每年1,500萬台），前途無可限量。
古勝