本文重點
農曆新年仲有兩星期就到，港交所（00388）主席夏佳理今年嘅新年願望係港股成交繼續多、經濟好以及財政預算案可以鬆手啲，言下之意莫非今年預算案會「派糖」？佢就話唔係呢個意思，只係感覺到現時老百姓生活都幾辛苦，希望預算案可以喺呢方面做多啲工夫。
佢今晚會飛去西班牙開國際交易所聯會（WFE）會議，相信係佢第一次以WFE副主席身份開會，本月中周文耀退休，夏佳理就順理成章接任該會副主席。去完西班牙佢就會轉飛俄羅斯推介香港，參加由當地投行主辦嘅研討會，亦會見吓當地企業。
自從俄鋁（00486）、南戈壁（01878）等海外公司相繼來港上市，過去幾年港交所積極推介海外公司來港已見到收成，尤其係俄鋁亦喺巴黎上市，睇番俄鋁呢兩日嘅成交，香港比巴黎多好多，香港國際集資中心地位更鞏固，夏佳理亦樂意繼續推銷香港！
李小加睇重人民幣產品
盛善祥回巢任顧問，佢話盛氏熟運作，返嚟可協助李小加，至於邀請盛氏係小加定係佢嘅意思，佢以內部事務為由不便評論。
李小加今年新上場，佢嘅新年願望自然係大展鴻圖啦！睇得出佢好想快啲做出成績來。佢依家最關心嘅係如何把握內地資金一旦湧進來，故必須發展人民幣產品，從佢喺內地《中國改革》雜誌親自撰文發表有關看法就可見一斑。呢本雜誌大有來頭，係胡舒立離開《財經》後新加盟嘅雜誌。
余絲韻