恒指扭轉連續六個交易日低收嘅局面，尋日重上20,300點水平，但成交減少，反映市大市承接力仍然疲弱，指數成分股仲未到撈底時候，詩詩亦繼續選擇按兵不動。不過，市況暫時喘穩，個別有消息嘅細價股，若有成交配合，跟勢短炒亦無妨。
好似尋日昌興（00803）股價有異動，以全日最高位0.49元收市，升幅12.64%，成交達4,862萬元。此股主要業務為熟料、水泥及其他建築材料買賣。上月下旬，其持有54%股權嘅直接附屬PMHL以38億元向台泥（01136）出售內地水泥及熟料製造及銷售業務。其實去年九月，昌興才以16.22億元購入PMHL股權。缸邊消息指，交易完成後，公司有意向大股東收購礦產，相信近日股價異動，與憧憬「注資」有關。
過去三個月，昌興股價喺0.4元水平上落，若短線能以大成交突破0.5元，可向上月高位0.58元推進，穿0.435元止蝕。
詩詩