本文重點
要喺金融界立足，除咗要有學歷，專業資格一樣唔少得，絲絲啲中環老友好多都有ＣＦＡ（特許財務分析師）嘅銜頭。要喺金融界出頭，好多人都爭住考ＣＦＡ，去年十二月考嘅ＣＦＡ一級試尋日派成績表，點知合格率就只有百分之三十四，創咗四年新低。
搵工基本資格多人考
金融海嘯後，金融界嘅工作少咗好多，而要求就提高咗，要搵份分析員工作，好多都要求具備ＣＦＡ一級合格嘅資格。隨着愈嚟愈多人考，競爭就愈嚟愈激烈，根據ＣＦＡ嘅數字，去年報考人數達四萬四千人，其中百分之四十五來自亞洲。相信今次嘅考生應該特別心急，因為尋日早上九點喺官方網頁公布成績，但係個網頁好快就癱瘓咗。
其實ＣＦＡ真係一啲都唔易考，內容由道德標準、證券估值、財務分析以至投資組合都有，主辦機構就建議考生溫習足三百小時，真係少啲心機都唔掂。絲絲聽聞有啲朋友好有恒心，連續五年屢敗屢戰，最終成功；又有做開基金嘅老友，因為唔夠時間溫習而唔合格。不過只要再畀錢，萬一不幸落第，考生亦可在今年六月再嚟過。
余絲韻