本文重點
永隆銀行自從被招行（03968）買咗後，中港業務自然成為重點，依家仲睇準內地班投資移民客戶，與景鴻移民顧問簽埋合作協議，好令各位投資移民首要考慮搵永隆打理資產，呢班客戶閒閒哋都有「幾球」身家，做到佢哋生意就一定有運行。
資管瞄準投資移民
香港呢片福地一向吸引，好多內地同胞都好嚮往，只要佢哋喺香港投資指定項目夠650萬元，就可以申請投資移民。依家景鴻會特別向投資移民嘅申請者推介永隆，幫永隆搵呢批大客。
絲絲與永隆企業傳訊部主管、高級經理伍尚修（Samuel）傾開偈，佢話內地人最鍾意嚟香港買豪宅，就算大把現金在手，佢哋都鍾意用按揭買樓，皆因香港按揭息口平；另外，永隆亦主打財富管理業務，幫佢哋打理資產。
話時話，自從永隆賣盤後，伍氏家族都低調起嚟。尋日記者會上難得由Samuel代表永隆向傳媒解釋今次合作，佢話過去兩年永隆都做咗幾十單呢啲投資移民客，估計今年都會吸引到幾十個呢類大客呢！
余絲韻