退休不足一年做顧問

羅力曾經喺摩根大通同美林工作，同李小加合作過，同聲同氣，李小加羅致佢係理所當然。比較意外嘅係去年四月已退休嘅港交所前結算科主管盛善祥，喺不足一年內重返港交所做顧問，主力處理運作事宜提大方向。

眾所周知，盛善祥與前行政總裁周文耀係好拍檔，○三年周文耀重返港交所時就力邀盛善祥回巢，而剛請辭嘅詹德慈亦頗得周文耀欣賞，連串人事轉變，與周文耀又有冇關係呢？熟悉周文耀嘅人士話，周文耀好相信「不在其位，不謀其政」嘅原則，所以近期港交所嘅人事變動，包括詹德慈請辭及盛善祥回巢做顧問，應該同佢冇關係。佢仲話搵以前嘅要員返嚟做顧問，對現時管理層可能有啲不是味兒呢！

羅力獲委睇市場發展

至於出任市場發展執行總監嘅羅力，曾參與安排多宗大型內地企業來港上市計劃。佢會專注高層次嘅市場發展方向，包括技術、產品發展，人民幣產品發展可能係其中重要任務。羅力個新職位與上市推廣科主管霍廣文嘅職務有冇重疊？知情人士話，霍廣文主力負責上市公司嘅上市推廣，與新設職位應該冇重疊。

余絲韻