本文重點
今年農曆大年初一剛好碰啱情人節，絲絲見到恒隆地產（00101）執行董事吳士元（Terry），當然問吓佢點樣同老婆慶祝，點知Terry話自己並非浪漫之人，由拍拖到結婚至今，佢都冇慶祝過情人節，亦冇喺情人節送過花畀老婆，所以老婆都有詐過型話佢唔夠浪漫㗎，不過好彩佢老婆唔係家庭主婦，而係事業型嘅女性，工作好忙，好多嘢到過咗就唔記得。
畀錢老婆揸手最實際
情人節都可以Skip（略過），咁Terry有冇諗過今年畀愛妻一個Surprise（驚喜），送番紮花畀老婆？點知Terry笑笑口話「唔好搞壞規矩」，仲話不如實際啲，等佢出咗花紅後，過啲錢畀老婆揸手咪仲好，又笑言：「我啲錢咪即係佢啲錢囉！」
佢又講笑話佢屋企係「母系社會」，好多嘢都係老婆揸Fit，不過佢同老婆一齊咁耐，除咗生日會食餐飯送吓小禮物之外，其他節日都冇乜特別慶祝，即使係佢哋嘅結婚周年，撞啱又係佢個大女生日，好多時都變咗係同個女慶祝生日。至於大年初一會點樣過？佢話會同阿媽、阿哥及老婆等一家人食飯度過。
余絲韻