港股連插六日，終於有反彈，但大家都係睇多過買，市場一啲炒味都無，經過今周嘅大屠殺，大家都怯怯地，咁又難怪，過去兩三日啲股仔嘅屠殺場面仍然歷歷在目，信心嘅嘢一旦失咗，唔係一時三刻可以恢復番，股票長過命，過去半年大炒特炒咗咁耐，都係時候休息吓。
尋日大市雖有反彈，但反彈力度認真麻麻，暫時入市應該要停一停，諗一諗。招商局（00144）旗下碼頭業務主要來自三大出口中心，包括上海、深圳及香港，隨住美國經濟回復正常，內地輸往美國貨品估計今年將有12%增長，近日有傳航運公司亦開始調升運費，反映出口向上勢頭，招商局嘅碼頭業務自然有得益。德銀便估計，招商局今年集裝箱業務可以有16%嘅增長，尋日大市反彈，招商局亦升5%，走勢對辦，暫時向上睇35元，止蝕就定24元。
古晨