本文重點
英國前首相貝理雅一辭職就投身商界瞓身搵真銀，除咗喺摩根大通做顧問外，近期仲撈埋過基金界，向一間英國對沖基金Lansdowne嘅董事演講，據講短短90分鐘就有6位數字英鎊嘅酬勞。
貝理雅要搵真銀都冇人阻佢發達，但弊在呢間對沖基金之所以咁闊綽，全因喺金融海嘯中沽空英國銀行股賺咗1,200萬英鎊，令佢哋賺大錢嘅銀行包括巴克萊及Northern Rock，後者結果仲被國有化。
辭官搵銀袋千萬鎊
貝理雅雖然喺任內支持率低，政策又富爭議性，不過前首相嘅政治經驗有價，所以Lansdowne先邀請佢演講，對未來嘅政治氣候進行分析。貝理雅嘅收費如何？佢嘅發言人拒絕評論，不過據報短短90分鐘收費達6位數字英鎊，自從離職後，演講、寫書、做顧問、出Show，佢已經賺咗過千萬英鎊！
余絲韻