本文重點
每逢呢段日子，無論娛樂圈及財經界都有唔少嘅年度選舉，回顧去年全年嘅成績，近日國際權威財經雜誌《Euromoney》就公布咗最新年度嘅亞洲最佳管理及管治公司評選結果，結果中電信（00728）同時獲評選為中國最佳管理公司及亞洲最佳管理公司嘅第一名，至於向來做開「一哥」嘅中移（00941），喺呢兩項選舉中都屈居「阿二」。
力壓中移連奪多獎
此外，中電信仲獲選亞洲最佳企業管治獎、最令人信服企業策略獎及管理層最樂於與資本市場溝通獎添，都咪話唔巴閉。中電信老總王曉初對於公司獲評為亞洲最佳管理公司，佢認為係對公司及全體員工嘅一個重大鼓舞，並感謝投資者支持以及上下各級員工嘅努力。
內地電訊商向來都較其他企業「乖」，不過早前中移有高層因涉嚴重經濟問題而被免職，之後又傳出聯通（00762）亦有高層被牽連，好似只有中電信冇乜嘢負面傳聞，呢個時候獲頒管理獎，都算為中資電訊商爭番啲分數。
余絲韻