絲絲平時成日睇小說，都算係驚慄小說大師史提芬京（Stephen King）嘅半個「粉絲」，唔知大家有冇睇開呢？絲絲近排同朋友傾開偈，知道滙控（00005）首席經濟師簡世勳（Stephen D. King）又出書，佢唔單止個名同史提芬京一樣，連本書封面都畀人恐怖嘅感覺，十分過癮。
簡世勳新作五月面世
簡世勳本新書嘅封面背景係一道旱雷喺黑夜中劈落嚟，加上書名叫《Losing Control》，絲絲睇埋作者個名，一唔留神真係以為係史提芬京嘅作品。不過呢本書就梗唔係驚慄小說喇，聽聞內容係簡世勳講番金融海嘯令成個世界嘅財富大轉移，搞到歐洲及美國嘅消費者唔再「先使未來錢」。
出走避稅由老婆話事
呢本書由耶魯大學出版，今年五月會率先喺英國面世，六月先喺美國推出，不過會唔會譯做中文版就不得而知。《Losing Control》係簡世勳精心之作，原來佢由○八年六月就開始寫，去年佢仲攞咗3個月假「起貨」。絲絲以為佢會搵大老細葛霖（大家都係叫Stephen）幫拖寫序，點知佢話係自己操刀，莫非咁樣內容會連貫啲？
英國收花紅稅收得咁厲害，絲絲見到簡世勳都忍唔住問佢，唔會因為咁而走，佢話走唔走唔係由佢話事，要返去問吓太座，睇嚟呢個問題，最有Say都係女人。
余絲韻