中化肥（00297）發盈警，預料○九年下半年及全年業績將會錄得虧損。受消息拖累，中化肥股價昨日顯著受壓，一朝早就裂口低開5.1元，最低見過4.96元，最終全日下挫8%，收報5元，且成交金額唔細。
走勢上，中化肥經昨日一跌，雖已補回一月六日的上升裂口，但短期仍未能樂觀，一旦股價連20日線亦保唔住，好大機會就要再向下補回一月五日造出的上升裂口，股價有機會重返早前橫行區域，即4元至4.5元之間徘徊。在過去五個交易日，其實亦已見唔少獲利盤湧現，當中包括瑞士信貸、摩根士丹利、里昂以及投資科技等，其現身沽盤由79至474次不等。昨日，中化肥股價走勢進一步轉差，金英、花旗以及渣打等的現身沽盤有增加趨勢，分別達43次、74次及90次。由於中化肥沽壓唔輕，暫不宜沾手。
（小尾）