本文重點
阿里巴巴（01688）主席馬雲有幾忙？大家只要睇吓佢今年又要喺飛機上寫加薪方案就知喇！尋日網上轉載咗一篇由馬雲喺飛機上寫畀員工嘅加薪方案，絲絲睇完都為阿里員工感到可喜及鼓舞，皆因佢哋有一位開明及有視野嘅老闆。馬雲提到今年公司會特別突出「獎罰分明」，同埋要打破「大鑊飯」及平均主義，所以今後開始，年終獎唔會再同工資掛鈎，而係根據員工對公司嘅貢獻分配。佢仲話會將發放獎金嘅原則放喺內聯網，等員工知道自己嘅獎金為乜會多咗或少咗，實行要大家願賭服輸。
馬雲照顧基層夥計
加人工方面又點呢？馬雲預期今年通脹難免，所以決定繼續加人工，而且加得唔少，至於加薪政策就會繼續向員工傾斜，副總裁或以上職級嘅不獲加薪。一家大企業往往會因為架構太複雜而影響效益，而基層員工嘅處境及待遇亦往往為老闆所忽略（員工成本愈低，老闆所賺愈多），但馬雲能夠做到公平、公正，確係阿里員工之福！
余絲韻