本文重點
公告好多時係本港投資者了解上市公司嘅主要渠道，但濰柴動力（02338）前日嗰份盈喜公告就嚇咗絲絲一跳，皆因佢哋「手民之誤」，竟然由預期賺31億至37億人仔，多咗100倍變成賺3,100億至3,700億人仔，提高透明度變提高驚嚇度，認真要打手板！
盈測報大咗百倍
話說濰柴前日出公告，喺英文版度話由於佢哋嘅產品市場喺去年下半年大幅改善，預期去年賺3,100億至3,700億人仔，竟然仲多過香港「藍籌賺錢王」中石油（00857）以及滙控（00005）、中移（00941）呢啲大藍籌，搞到前日股價逆市升咗1.3%；點知公司尋日先發現擺烏龍，將個單位「萬元」搞錯咗做「百萬元」，即刻連累股價「跌凸」，全日跌咗6.9%。
絲絲成日喺電視聽到證監會呼籲，提醒投資者做決定前最緊要睇清楚同問清楚，之但係如果啲公告好似濰柴咁擺晒烏龍，咁就真係麻煩，大家以後記得睇公告時要小心啲，睇吓究竟係咪合理！
余絲韻