本文重點
美國貸款商亂借錢畀人，結果搞到次按危機爆破，美國房地產市場衰咗一大輪，雖然去年經濟穩定番，不過危機係咪已經過去仲好難講，其實唔單止一般房屋嘅價格未升番，連白宮嘅估值去年都縮水5.1%，即係成1,580萬美元（逾1.2億港元）。
奧巴馬慘被揶揄
美國總統奧巴馬上任差唔多一年，唔少人自然趁呢個時候對佢評頭品足，美國經濟雖然已穩定咗，但仲未有明顯反彈，有美國傳媒就揶揄話連「總統先生」都不能擺脫房地產衰退，擁有132間房嘅白宮價值由○八年約3.3億美元跌至去年嘅3.08億美元，近期再跌到2.92億美元。
白宮佔地5.5萬平方呎，一向係美國總統居所，去年奧巴馬新居入伙，雖然做過裝修，加咗個菜園同埋鞦韆，不過都無助物業增值。美國人似乎對樓價大跌仲未釋懷，有人仲明知故問，話到底奧巴馬使唔使因為樓價下跌搵銀行做再融資！
余絲韻