本文重點
自從股神巴菲特喺○八年入股比亞迪（01211），令後者股價水漲船高後，市場時不時都會傳股神睇中某某公司，好似本月初先剛啱傳出股神睇中Ａ股宗申動力嘅摩托車動力系統，搞到呢間公司股價連續出現咗兩次漲停板風波；最近又再有股神「緋聞」，話佢對一間鋰電池公司眉來眼去。
「訪問」出街疑老作
內地網友最近貼咗一個巴菲特嘅訪問內容，除咗翻譯成中文外，仲貼埋英文原版，內容話佢好睇好中國巨大電動汽車市場，仲話將會喺許可嘅情況下，委託中國一間基金公司入股一間新能源鋰電池材料嘅壟斷公司，於是大家就估係杉杉股份，好彩今次呢間公司好負責任，即刻否認咗，否則佢哋股價又會好似坐過山車咁癲。
《上海證券報》特登查證吓呢篇報道，發覺美國嘅傳媒根本冇呢篇報道，而英文版嘅專訪報道中又錯漏百出，文法又唔通，於是懷疑篇嘢係偽造嘅。今次好彩發現得早，如果唔係啲內地股民可能無端端上錯車。
余絲韻