新地標搞命名比賽

新地興建嘅環球貿易廣場（ICC）好快就落成，成為全港最高建築物，有88層樓高嘅國金中心即刻變「阿二」。新地副主席郭炳聯尋日就向絲絲介紹咗觀景台嘅特色，以及命名比賽嘅細節，佢話新地希望呢個觀景台成為本港新地標，吸引多啲世界各地嘅遊客嚟感受香港呢個「動感之都」嘅魅力喎。

據講ICC嘅高度係海拔490米，觀景台會喺第100層，面積約3萬平方呎，高度係海拔393米，之上係酒店，100樓以下係商業樓層，由二樓坐上去100樓只需60秒，要步行嘅話就視乎你嘅體能，喺觀景台可以360度咁欣賞迷人嘅維港兩岸景色。

做得觀景台就梗係有好完善嘅配套，呢個投資額達一億元嘅觀景台，會有嶄新嘅多媒體展覽、MP5視聽導賞系統、先進望遠鏡等。絲絲講咗咁多觀景台特色，係咪可以刺激到你嘅小宇宙，幫手諗個活力澎湃、琅琅上口、別具創意又易記嘅名？

絲絲只會係參賽者，評審就留番畀一班專家，好似郭炳聯、田北俊、靳埭強等嘅專業人士啦！

余絲韻