內地收緊銀根，上證本來已開始企穩陣腳，但港股就好似食錯嘢咁，狂瀉不止，恒指出現複式頭肩頂走勢，尋日仲跌穿埋21,000點條頸線，唔通大市真係要調整調整？查實近排啲股仔炒得咁狼，都早已有少少見頂feel，睇來暫時入市都無謂太勇。
大市咁插法，想搵吓食都唔易，古晨就覺得仍有部分板塊可以留意，好似醫藥股就係其中之一。去年年底內地推出咗個8,500億嘅醫改方案，咁大塊餅，自然令唔少醫藥企業受惠，廣藥（00874）本身亦係受惠企業之一，旗下有12隻藥品納入咗發改委新國家藥品名單中，炒醫藥股自當係首選。事實上，廣藥股價亦持續強勢，自從十一月開始，一直可以守住20日線反覆炒上，幕後維持秩序了得，相信業績前都未炒完，暫時估計頂部隨時可見8.5元，跌穿6元咪作止蝕囉。
古晨