絲絲本來以為佢講完就走，點知絲絲喺論壇場地行吓行吓，發現喺某個櫃枱上面有啲資料寫住羅奇會有個簽名會，只係提及時間及地點，其他詳情就乜都冇，打聽吓方知佢為本新書搞個簽名會。

絲絲聽完佢場演講後，跟住就去咗佢嘅簽名會，仲同佢傾咗幾句。佢本新書其實都唔係好新，去年九月已經面世，叫做《The Next Asia》，去年十一月就出埋中文版，全球發行量有25,000本，喺亞瑪遜網上書店財經書籍銷售排名榜上仲曾經升上第2位，都幾威㗎！

新書收益全部捐中國

佢話呢本新書銷售所得收益全部用作慈善用途，分別捐畀位於上海嘅中歐國際工商學院以及中國愛滋病防治行動。

點解全部都捐畀中國？佢話因為自己對中國有份熱忱，有一次喺嗰間學院演講，被一班內地學生深深打動，佢又覺得內地愛滋病人好慘，因為呢個病係社會忌諱，所以個人好想幫助佢哋。絲絲估計都唔係好多人知佢搞咗個簽名會，如果知嘅話，尋日排隊簽名嘅人龍又點會咁短？

余絲韻