內地再傳收緊銀根，尋日A股同港股無一幸免，顯著下挫，恒指再向21,000點進發，近期大戶出晒口術要向下炒，恒指短期都係無運行，好彩資金炒股唔炒市，市場仍有唔少炒股供選擇，鑊鏟友唔愁無嘢炒。
一月過咗一大半，市場又開始炒業績，去年金融海嘯，上半年個個睇到好悲情，下半年受惠於多國救市措施，好多企業不但恢復番盈利能力，個別仲可以創下季度新高，美國唔少科技股都交出一份唔錯嘅季度成績表，這個亦係支持美股再創新高嘅動力。
近期美國科技股屢次報喜，本地資金亦開始留意啲科技股，好似隻比亞迪電子（00285），由於近期摩托羅拉同埋諾基亞都搵佢幫手做ODM手機，估計今、明兩年盈利應該有可觀增長，而啲大行亦紛紛調高佢嘅目標價，尋日見佢剛剛破位，隨時來個大飛天，向上暫睇9元，止蝕可以考慮6.5元。
古晨