本文重點
投資銀行傳統會在一月底，即未來兩星期派發花紅。依家市場估計高盛、大摩及摩通三大美資投行，今年將合共派出276億美元獎金，比去年多49%，亦勝過○七年大旺市的268億美元歷史紀錄。不過，賓架們錢未到手，卻聽到美國總統奧巴馬為要教訓投資銀行家，可能向華爾街金融業巨頭徵收「金融危機責任稅」，肯定無晒心情。新稅項預計六月實施，照計二月就要提呈國會，據知近日幾大投行已放風，為息事寧人又好、博公眾同情又好，準備將今年花紅七至八成，以授股權或者遞延薪金方式發放，換句話講，投行大員係有得睇無得使，要等幾年至有錢落袋。筆者相信中環頂級食肆，唔使幾耐會體現這「莫財」寒流有幾勁。至於賓架最愛的豪宅跑車，隨時都會有斷供斬纜情況。
提防熱錢有流出迹象
周四，美股未受差勁零售數據影響，道指先跌後回升，收報10,710點，升29點，是十五個月收市新高。反觀港股，周五就依然受人行揭開緊縮貨幣政策序幕所影響，反彈乏力，尋日再跌62點，報21,654點，全個星期計，恒指跌643點或者2.5%，唔算多，但陰陽燭圖出現連續五支陰燭，技術走勢反映後市調整壓力唔細，尤其美電有轉強迹象，執筆時美元兌港元已升至逾7.759，係接近十個月高位，小心熱錢有開始流出情況。
周五收市後，儀征化纖（01033）出盈喜，指按照中國會計準則，去年全年股東淨利潤將實現盈利，扭轉○八年股東應佔虧損達16.41億元（人民幣‧下同）的劣勢。儀征解釋，虧轉盈主要受內地經濟改善以及主打聚酯產品需求和價格回升，令產品毛利好轉所致。
睇番第三季儀征賺6,782萬元，累計三季賺3.75億，全年虧轉盈應無問題。平心而論，儀征屬於業績表現最唔穩定的一批國企之一，○六、○七年純利分別為4,047萬元及2,231萬元，但到○八年又勁蝕16.41億元，都算搵埋唔夠輸一鋪。由幾間大行預測，儀征○九年賺4.85億元，市盈率16.7倍，以工業股角度不過不失，唔算十分便宜。由歷史估值去看，九八年儀征曾經因為亞洲金融風暴，業績見紅，翌年止血，當時市帳率由谷底0.17倍反彈到1.5倍，去年第三季其每股NAV 1.76元，目前市帳率1.14倍，套用落去，憧憬業績見底再升一至兩成唔難，問題反而係儀征有否較長線的策略，在激烈的化纖市場上，提升競爭優勢。
戴峰修