本文重點
喺交易所工作近15年嘅周文耀尋日Last day，正式交棒畀李小加。港交所通告披露，李小加合約為期3年，底薪720萬元，較周文耀○八年底薪780萬元略低（周文耀年薪連花紅及其他福利合計達1,382萬元），另有75萬元作為補償佢加盟港交所前禁制期內收入損失嘅特別津貼，以及遷移津貼10萬元。
港交所早改制送股票
周文耀○三年重返港交所時獲重金禮聘，獲授328萬股認股權，每股行使價8.28元，港交所早年已改制度，唔再授出認股權，只會向員工送股票。暫未知李小加有冇獲送股票，但佢將可收取酌情表現花紅及其他實物福利等。
李小加喺港交所嘅待遇，相比佢之前任職投資銀行可能有啲距離，但「路遙知馬力」，只要港交所股價爆升，「錢」途無可限量呢！
周文耀持股市值4.8億
至於周文耀，港交所權益披露資料顯示，佢尋日額外增加10,915股港交所，持股量達3,297,194股（或0.31%），按港交所昨收市價計，市值4.837億元。打工可以有如此豐厚待遇，退休又咁風光，周文耀應該冇乜遺憾。
周文耀話退休後會參與一啲兼職，可能與慈善團體、大學及專業團體有關，至於係唔係已有上市公司招攬佢做非執行董事，佢就大耍太極，只係話未來幾個月都唔會考慮。退休後佢會睇多啲書，例如歷史及文學書籍。
佢尋日退休，心情Natural high，除咗有求必應，簽名影相留念之外，最後更出其不意喺離開交易所門口時，睇準在場冇攝影機，向各位送上「飛吻」，就此瀟灑咁離開，大家都會懷念佢！
余絲韻