本文重點
港交所（00388）行政總裁周文耀今日就正式退休，佢嘅退休訪問就奉獻咗畀官方刊物《交易所》，周總喺訪問中自爆，話「金融教父」馮景禧及港交所前主席李業廣係佢職業生涯兩個重要嘅人，佢又話退休後仲有好多嘢想學，會搵一、兩個新科目學吓，但就肯定同財務金融冇關喎。
馮景禧係啟蒙老師
周總喺八九年加入聯交所前，已喺有「金融界少林寺」稱號嘅新鴻基證券工作，當年係老闆馮景禧身邊嘅愛將，佢話馮老係佢嘅啟蒙老師，當年佢突然由IBM轉入金融界，都係馮老畀機會佢先至可以踏足證券界工作，仲話馮老對佢之後嘅事業生涯有莫大影響。
講到另一個對佢好重要嘅人，周文耀就話全賴李業廣獨具慧眼，因為佢當年深信開辦H股市場可為內地企業及香港帶來莫大裨益，前前後後用咗20個月籌備，最終促成九三年第一隻H股青啤（00168）上市，開創咗今日大量內地公司來港H股上市嘅局面。
周總又話退休生活肯定要啲時間適應，因為冇咗秘書及其他同事幫忙，樣樣都係靠自己。
余絲韻