本文重點
相信用「兜兜轉轉、離離合合」嚟形容「輪場」嘅人事變動最適合不過，絲絲知道最近又有人「埋咗位」，仲要爆出個大冷門。
接替朱紅 已經返工
話說上回講到荷銀前股票衍生工具及私人投資產品董事何啟聰（Ivan）喺去年十一月離職後，佢嘅去向一直成謎，市傳佢會過檔渣打（02888）或中資銀行做「開荒牛」，點知最後結果竟然係爆出大冷門。
今次絲絲收到可靠線報，話Ivan會加盟瑞信，接替朱紅出任股票衍生工具銷售及市場推廣副總裁一職，並已經喺日前開始返工，下個禮拜就會正式對外公布。
瑞信每次有人事變動都會有新搞作，絲絲記得佢哋喺去年七月推出牛熊證時，就請咗一批新嘅交易員幫手，後來亦推出全新窩輪牛熊證網站。
今次有新人加盟，相信今年瑞信應該會滿腹大計，希望逐步提升市佔率。
余絲韻