利嘉閣搶攻跑馬地

世紀21奇豐物業許秋偉同Vincent講，迎濤灣發展商最近以一口價推售貨尾，帶旺埋同屋苑二手，好似夏雨揸咗兩年幾嘅Ａ座高層Ｈ室最近都賣出，成交呎價四千三百四十五元，屬合理市價，對比○七年十一月買入價三百八十八萬元，帳面獲利三十四點八萬元，升幅約百分之八點九。

夏雨昨日話，個單位租客啱啱搬走，剛好有新買家，而價錢可接受，所以就賣出個單位，而今次賣樓有多少執吓就算。

樓市好，代理老友頻頻報喜，利嘉閣日前就擢升咗四十四位精英。該公司高級區域董事張偉光話，舊年唔少同事表現都好出色，好似黃泥涌道分行嘅吳紹豪全年營業額接近一千六百萬元，除咗係○九年度嘅千萬主管外，仲晉升做跑馬地區嘅助理區域經理，由於睇好今年市況會穩步上揚，所以今年喺跑馬地區會加開兩間分行同三隊團隊，希望可以搶佔區內更高嘅市場佔有率。

（Vincent Lau）