本文重點
僑豐金融董事總經理許照中一向都有寫文章嘅習慣，近日佢忽發奇想，計劃為自己寫一本自傳。佢話自己雖然一生平凡，今時今日唔算係好有錢，但都算可以喺社會立足，細佬許漢忠（機管局行政總裁）喺事業上亦有一番成就，自己都感到好欣慰，所以想為自己記錄吓咁多年來喺工作及家庭上嘅點滴，寫本自傳留畀自己睇！
寫自傳放入保險箱
咁佢打唔打算將本自傳出版呀？佢講笑話可能會將本自傳放喺保險箱，等自己走咗之後，先至交畀老婆處理！本自傳未知幾時開筆，但佢心目中已經開始進行構思，估計要完成起碼要寫幾年。咁都好，可以將未來數年發生嘅事記錄埋喺呢本自傳度。
許照中仍未言休，但佢位老友港交所（00388）行政總裁周文耀本周五就正式榮休，咁佢點賀周總呀？佢話會喺麻雀枱上「祝賀」周總退休，因為佢實在太羨慕對方可以退休，直情係有啲「眼紅」，所以諗住同佢打麻雀時都唔會「鬆章」呢！
由於周總近日太忙，日日都有歡送飯局，好似喺上周二，歷屆聯交所理事就為佢設飯局，股壇教父李業廣及袁天凡等猛人都有出席，所以許照中會等周總榮休後先約佢打牌。
余絲韻