內地通過開展融資融券及股指期貨，刺激A股昨日顯著高開，可惜力度認真麻麻地，高開後升勢無以為繼，睇來無乜氣勢，恒指本來突破咗上次反彈高位，但可惜尾市都係腳軟軟，不過市場鑊氣就依然十足，內地出口回復正增長，航運股碼頭股即時炒上，暫時仲係逐個板塊炒作。
紅籌重組仍在繼續，航天系係最早炒重組消息嘅，過往呢一系之中，以中航工業（00232）炒味最濃，但今次升浪中，同門其他師兄弟一早炒咗上去，相反中航工業就好落後。
不過睇番中航工業幅股價圖，明顯見到大型三角形走勢，而且已經行到尾聲，現時50日線上到0.39元，準備同10日及20日線匯合，突破在即，近日股價已經唔再安守於0.4元之下，大戶密密掃貨之時，睇嚟隨時發動攻勢，量度計可以見0.65元。中航工業話晒近期無乜升過，風險唔大，止蝕位可以考慮0.36元。
古晨