李嘉誠舊年不斷增持長和系股票，踏入二○一○年，長和系亦最早有大動作，和黃（00013）以每股2.2元即三成三溢價私有化和電國際（02332），後者復牌急升兩成多，報收2.12元。舊年和電分拆港澳區業務上市，加埋將以色列業務套現，手上剩餘業務集中喺未踏入收成期，規模相對較細的東南亞市場，趁低私有化合情合理，對小股東亦唔係壞事，至少五年前上市只係6.01元，過去收番兩次息接近每股13.75元，回報都幾和味。

值得深究反而係，連番被增持的長和是否醞釀重組！始終和黃過去一年係大大落後，斷估唔少投行都會出謀獻計，想辦法將隱藏價值反映喺股價上面，要搵今年追落後的大藍籌，正副選擇毫無疑問係中移（00941）同埋和黃。

樓市成交旺 利美聯

另外，自聯儲局表明傾向讓低息期延長，數據顯示去年十二月下旬本地樓市交投有升溫迹象，地產代理美聯集團（01200）股價早於去年十一月見底，由5.25元到尋日的7.36元，累積升幅近四成，跑贏地產股及大市一大截，○九年香港物業成交宗數創十二年新高，業績好係預期中事，但由彭博資訊綜合大行預測，分析員對一○年同樣樂觀，估美聯賺4.31億元只係比○九年嘅4.41億元少1,000萬元，預期市盈率12倍左右，都仲幾吸引，短期應該仲有水位。

熱錢四圍搵機會，終於輪到運動鞋連鎖店寶勝國際（03813），股價急升一成七報收1.39元，更精彩係成交1.54億股，係○八年中上市以來最高，可見游資充裕。

寶勝急升緣於美林出報告唱好，認為內地運動用品庫存回升，有利寶勝毛利改善，同大部分內地零售商一樣，預期寶勝同店銷售增長今年將谷底回升，美林估計一○年賺5,700萬美元，比去年的1,700萬美元大幅反彈，亦接近○八年6,100萬美元的最高紀錄。

寶勝市值59.6億港元，或者7.7億美元，以美林預測市盈率13.5倍計，在擁有自身品牌（去年已完成東之杰的收購）的內地零售股中都算便宜，反而火燒冷灶後反覆則在所難免，最理想仲係用分注形式吸納，筆者直覺周五經歷鼎盛場面之後，要回到1.3元樓下唔容易，周一重開不妨留意。

戴峰修