保誠並冇主動挖角

英國保誠依家喺新造壽險業務方面，都叫做保險商一哥，而ＡＩＡ喺香港源遠流長，計番成個保險業又係一哥。兩位一哥旗下嘅保險經紀當然都有番咁上下水準，據聞唔少ＡＩＡ部屬主動向舊老闆、現任英國保誠香港行政總裁容佳明敲門，而唔係英國保誠主動挖角。

其實保險經紀呢個行業，流動性不嬲都有喺度，唔理邊個主動邊個被動。只不過舊單嘅客仔就慘啲，如果個經紀轉咗新公司，自己帳戶就會變咗孤兒仔，好多時都好難搵番個經紀打理戶口。

再問吓ＡＩＡ嘅老友，雖然佢冇講近期係咪流失咗好多人手，不過截至去年六月底，佢哋有成八千個保險經紀，佔全行經紀約兩成半，近年人手數字平穩增長，喺過去半年都冇乜大改變。

余絲韻