新一年充滿挑戰

銀公主席一職係由本地三間發鈔銀行輪任，絲絲記得上次由渣打主持銀公會議已係○七年嘅事，當時代表渣打嘅係蘇利民。

雖然阿Ben喺○七年曾做過銀公署理主席，但尋日係佢首次正式「坐正」主持銀公例會及記者會，絲絲對佢初試啼聲嘅表現亦覺滿意。

阿Ben尋日笑容滿面咁同記者講，話好開心第一次主持銀公會議，佢相信今年銀公將會好充實，但同時亦充滿挑戰。睇佢對答流暢，相信事前做足準備工夫。佢又話今年銀公嘅工作重點會集中喺三方面，分別係加快香港人民幣業務發展、優化新嘅監管措施及條例、增強公眾對銀行業嘅信心，銀公今年會積極參與多項諮詢工作，推動業界發表意見，希望從而提升香港國際金融中心嘅地位及長遠競爭力。

余絲韻