本文重點
鄭裕彤（彤叔）嘅新世界上市王國，近期頻頻見佢哋嘅第三代曝光，陸續出任核心上市公司執行董事，新世界中國（00917）尋日宣布，委任鄭志雯及鄭志謙做執行董事，而老臣子梁志堅、杜惠愷、周桂昌就由執董調任非執董，好明顯係要培養生力軍接班人。
志雯志謙任新中執董
鄭志雯及鄭志謙都係彤叔嘅孫女、孫仔，雯女乃係「八十後」，芳齡只有29歲，係彤叔大仔純官鄭家純個千金；謙仔就係彤叔二仔鄭家成嘅公子，亦只有31歲。
兩位除咗年輕，仲有好高學歷，雯女係哈佛文學士，修經濟，曾於華平投資工作，去年二月獲安排做新世界酒店管理嘅執行副主席；謙仔就係加拿大多倫多大學文學士，○五年開始做中國物業管理，早前先喺彤叔有投資嘅國際娛樂（08118）及新時代能源（00166）做執董。
相信兩位都係表現出色，先可以正式升到「新世界」牌頭嘅上市公司做執董，兩位同樣收董事袍金15萬元，年薪96萬元。相信最開心應該係彤叔，因為一眾孫仔孫女都咁出色。
余絲韻