本文重點
新一年開始無耐，絲絲見到啲「賓卡」已經馬不停蹄為業務忙，當中梗唔少得頻頻喺媒體亮相嘅工銀亞洲（00349）董事暨副總經理黃遠輝，佢尋日出席工銀亞洲與廣深鐵路合作推出嘅銀聯雙幣卡發卡儀式時，除咗祝願大家新年快樂、身體健康之外，大會公關仲請咗兩位妙齡「G模」參與發卡儀式，絲絲見到都頓覺精神爽利。
搭火車可刷卡入閘
講番工銀亞洲今次發行呢張信用卡，除咗備有雙幣特色（即擁有人民幣及港元兩個帳戶）之外，仲內置非接觸式支付功能，可以畀持卡人乘搭廣深線「和諧號」列車嗰陣直接刷卡入閘，唔使特登排隊買車飛。
為咗凸顯呢張信用卡嘅特色，喺發卡儀式上，大會就準備咗好似售票機嘅道具，而兩名身穿制服嘅「G模」就充當廣深鐵路職員，當主禮嘉賓將港元及人民幣放入售票機時，部機就出咗一張廣深鐵路雙幣卡。絲絲以前覺得外資公司喺創意方面會略勝一籌，但原來中資公司都唔輸蝕㗎。
余絲韻