新一年，新景象，希望各股友股票贏唔停，二○一○贏到二○二○。元旦假前詩詩見港股升勢不俗，決定買番些少貨過長假，以每股2.18元買入廿萬股中國森林（00930），收市都係咁上下。豈料大除夕美股「贈興」，道指跌逾百點，不過詩詩又唔係太擔心，只要係實力股，那怕短線震盪，過後又可重拾上升動力。
選股幾時都係好重要，中航科工（02357）蝕錢蝕到入肉，市值又奀，但何以去年十一月，其股價可以升至3.61元歷史高位，講到尾又係因為母公司財雄勢大，早已表示會向公司注資，所以中航科工股價可以在連續兩年勁蝕多過10億元人民幣下，去年竟上破○七年高位創新高。
中航科工已落實與大股東中國航空工業集團資產互換，未來亦有機會被打造為中航集團A股外的資產整合平台，未來3至5年內，中航科工將有機會獲注入1,500億元資產，難怪在虧蝕連年下，股價長升長有。股價在3元附近有支持，現價買短線博重返高位3.6元，跌穿3.1元止蝕。
詩詩