踏入二○一○年，講聲新年進步之餘，亦代表我進入投行已差不多半年。臨近長假期前，成交轉淡，holiday mood轉濃，剛巧接連有大學生來進行面試，所以其中一個話題是應徵者表現。能夠有機會面試的個個都是名牌大學準畢業生，不少更專登趁假期由美國或英國來香港見工。

新人搵工忌吹水

同事甲說：「我問個男仔，請你講出五隻恒指成分股，佢居然連滙豐都答唔出。」其他人插口：「人哋在美國住，你應該問道指有咩成分股啦﹗」「佢在resume（履歷表）寫自己熟悉港股喎？」同事甲反問。

其實以上情況不止在一個應徵者身上出現，在履歷表寫自己有投資港股經驗的也往往答不出恒指有甚麼成分股，甚至問他當初為甚麼投資個別其正持有的股票，也不能回應。

無可否認，不少人認為應在履歷表上「吹水」是贏得一份工作的重要關鍵。不過，正是機會只留給有準備的人，既然你夠膽說自己熟悉香港股市，麻煩你同時放一些時間做功課，做準備。

履歷表你可以寫得天花龍鳳，當然美麗的履歷表可以幫你爭取投行的面試機會，但得到面試機會後就不能再只靠「吹水」。

大健