滙控供股狂插「震」人心

滙控去年宣布22年以來嘅世紀大供股，之後股價愈跌愈多，直到三月九日交易時段收報37.7元，收市後10分鐘內更低見33元，散戶見到個電視螢幕顯示「33」蚊即時嘩嘩聲，反應最大都應該係「青姐」（股評人胡孟青）喺電視螢光幕前留下嘅第一滴淚，亦牽動咗大家對滙控嘅情意結。

當大家驚緊股價再插之時，亦有唔少散戶喺五、六十蚊開始撈貨，雖然遲咗少少，但都算執到啲，滙控上月喺86至93元橫行，唔少股友都有分段入市，有信心一○年可以變番紅底股。

高妹︰收集咗好多散戶嘅意見，大家都一致推舉「滙控跌到33蚊」可以納入股壇經典事件簿。

莉莉︰始終呢件唔係乜嘢開心事，仲一度引起我哋嘅恐慌。

散戶蘇先生：滙控跌到33元嗰陣，我第一個感覺係出奇，第二下先識得驚，雖然我冇供股，但佢上番80元時，我就再入多4,800股，有番啲信心。

散戶劉先生︰我都冇供股，升番到60蚊已走咗貨，真係嘥晒。

撤U盤時段散戶叫好

自從○八年五月二十六日推出「勁假時段」，股份被「嘜」價嘅情況頻現，股民齊齊聲討。直至去年三月十二日，即滙控股價被扯低落33蚊嘅第三日，港交所就宣布取消「U盤時段」，並喺三月二十三日（即滙控供股權買賣第一日）落實執行，令呢個措施面世唔夠一年就玩完。

20大新股逾半「潛水」

港交所（00388）榮升全球新股集資額最高嘅交易所，但當中20隻集資規模最大嘅新股，一半以上嘅股價至今仍然「未返家鄉」。不過，亦有啲新股幫到股友賺錢，好似○九年壓軸登場嘅譚木匠（00837）一上市就高開35.7%，收市報3.93元，較招股價大升52%，股友每手賺2,700元。

如果股友抽中霸王（01338）及神冠（00829），而又未有沽貨，上市至今每手帳面分別累賺7,700及6,620元，成為去年兩大最賺錢新股。而承達（02288）則為表現最差嘅新股，上市至今累挫38%。

證券行續玩「音樂椅」

敦沛證券（00812）去年嘅人事變動一波接一波，繼前投資研究部主管郭家耀喺去年七月尾轉投海通證券後，前董事總經理黃偉康（Andrew）亦喺上月中離職。睇番資料，其實Andrew轉工向來頻密，記得佢○八年八月先由一中證券轉去灝天金融，做咗八、九個月就過檔敦沛。

十月牛皮市股友自娛

十月份大市多數唔上唔落，嗰排孖妹落到行，見啲股友都冇乜心機，收咗市反而醒神番，原來佢哋一收市就玩啤牌和捉棋，可見紙牌遊戲嘅威力比股市仲大。

新一年已經開始，唔知股友對二○一○年港股感到樂觀嗎？據今期《東方產經》民調，截至上周末晚上6時，話樂觀嘅股友有53.9%，話悲觀嘅有12%，持中性態度嘅有34.1%。散戶黃先生就穩陣啲，佢話一月份恒指較難上到22,000點，會等啲公司出埋業績，二月先至重錘出擊。不過，見到心急嘅散戶已經撈咗底，孖妹只會奉勸一句「魚頭魚尾唔好要，魚腩先至最和味嘛」。

耀才花紅最多20個月

耀才證券上月喺荃灣開設第一間分行，新客戶更可獲贈名貴金水晶麻雀禮物乙份。耀才總經理陳啟峰仲話：「生意好，所以每名員工都會有花紅分，表現最好嗰位員工，最多可以拎到20個月花紅。」

證券才子喜事一大籮

過去一年拉埋天窗嘅「才子」有金利豐證券研究部董事黃德几，佢喺迪士尼大搞浪漫婚禮；致富證券資產管理部經理鄧澤堂亦喺去年小登科，所有「輪王」、「輪后」都有畀面去飲喜酒。好事陸續嚟，時富金融中國資本投資部董事羅尚沛亦已放假陪老婆坐月。

致富擴充要做「行霸」

講到逆市擴充業務，就一定非致富證券莫屬，全因佢去年一口氣連開5間分行，分行累積達17間之多。聽番致富董事總經理周松堦講，今年只要睇啱地點，佢哋唔排除會再開分行，而地點已鎖定將軍澳區。

中資海通收購大福

新創建（00659）喺去年十一月公布，向海通證券出售大福證券約52.86%股權，總現金代價為18.22億元。行內人士仲話，本港證券行要打入內地市場分一杯羹根本冇可能，單論財力已難以跟內資匹敵。去年五月公布《CEPA補充協議六》後，本地券商股價雖曾被炒起一陣子，但只屬虛火。

證券界掀名嘴挖角潮

去年股市暢旺，連帶證券界亦掀起一場「名嘴」爭奪戰，好似喺新鴻基金融做策略師已有4年零9個月嘅彭偉新，就轉投信達國際擔任研究部董事；信誠證券前聯席董事連敬涵亦喺去年轉投僑豐證券擔任業務發展董事。就連喺東泰證券做咗好耐嘅鄧聲興，亦轉咗去泓福資產管理任執行董事，真係「一年人事幾番新」。

莉莉、高妹