今日係二○一○年首個交易日，古勝先同大家祝願今年事事順利，長炒長勝。唔少鑊鏟友對今年都充滿期望，因為早於過年前，七大孖沙券商不約而同發表睇好又唱好本地魚缸的吹水報告，綜合預測，恒指可升至25,300點至29,208點不等，升幅可達15.7%至33.5%。當中以「大魔頭」最為樂觀，指恒指大有機會上試三萬大關。一般芬佬則認為本地魚缸今年要見二萬五至二萬六並非難事，但要攀升至二萬八甚至三萬點水平則過分樂觀，皆因祖國極有可能在今年下半年開始實行收緊貨幣政策，屆時定必影響魚缸表現。
熱錢未使驚流走
至於去年本地魚缸出現V形大反彈，恒指在三月份低見11,344點後，大量熱錢湧入，令升勢持續至第四季，並高見23,099點，全年波幅高達105%。古勝相信此情此景在今年不會再復見。至於缸邊友一直擔心熱錢在今年會迅速流走，拖累本地魚缸表現，古勝則較為樂觀，皆因外資大行都睇好祖國及東南亞其他市場，祖國經濟增長勢頭良好，孖屐預期「人仔」升值，本地魚缸作為曲線投資祖國的最佳途徑，更多熱錢流入的機會，似乎大過熱錢大量流走。
睇番本地魚缸在大除夕半日市，勁升逾三百點，但花旗魚缸卻「臨尾香」，道指散場前急跌逾百點，拖累在花旗掛牌的ADR全線仆直，按ADR整體跌幅推測，本地魚缸今年或開低近百點，較悲觀的睇法，則有機會低開逾二百點。不過睇番花旗大除夕公布的經濟數據表現不俗，花旗魚缸當晚急挫，只係因為華爾街缸邊友齊齊鎖定○九年利潤，古勝又唔覺得有乜大不了。
在元旦日期間，亞洲、歐洲及花旗魚缸股市多數休市。至於在大除夕最後一個交易日，歐洲魚缸則受到亞洲魚缸帶動而普遍做好，全年更創下十年來最佳的表現。回顧去年，花旗魚缸三大指數均錄得雙位數字的升幅，係自○三年以來表現最佳的一年。
小魔怪積極增持
個股方面，馬鋼（00323）近日表現呈強，主要係因為「小魔怪」上月頻頻在孖屐掃貨增持，根據港交所（00388）資料顯示，「小魔怪」目前的持股數目增至2.27億股，持股量上升至13.12%。
「小魔怪」咁積極買貨，當然係睇好其前景，雖然去年祖國鋼鐵企業經營困難，但隨着經濟復甦，最慘情時期已過，相信鋼材價格今年可穩步回升，馬鋼盈利能力亦會改善。古勝相信，來自祖國汽車及家電製造商對鋼材的需求，今年會持續上升，鋼價在今年仍有一定上升空間。而馬鋼亦係手持「茄薯」較多的祖國鋼鐵企業，股權結構亦較簡單，有利購併，係古勝鋼鐵股首選，值得憧憬。
古勝