本文重點
每逢大時大節，絲絲好鍾意同一大班朋友開派對兼玩遊戲，最近就發現咗一隻全新嘅炒股棋盤遊戲，呢個Game叫「投資樂園」，由銀聯信託投資總監林一鳴（Eddie）聯同佢有份創辦嘅亞洲投資者協會研究原創，遊戲模擬投資真實嘅股市，對象係有投資經驗嘅成年人，每名玩家會先獲得股票及現金，期間進行買賣，又會收取股息，最後擁有最多錢嘅就係贏家。
Eddie話市面上嘅棋盤遊戲有好多種，但與投資股票有關嘅就少之又少，佢希望「投資樂園」第日可以好似「大富翁」咁家喻戶曉。「投資樂園」要到一月中先有得賣，售價未定，大約200蚊左右。
試玩會反應好
佢哋喺十一月就搞過3場試玩會，據知反應好好，Eddie亦計劃明年搞個類似雀局形式嘅定期聚會同比賽。捉棋當然想贏，Eddie有乜致勝竅門？佢就好「玄」咁話要留意其他投資者嘅反應，「預測別人的預測」，仲話發現大部分玩家都會犯上相同錯誤，例如羊群心理及高位追貨等，同真實炒股好相似。
余絲韻