本文重點
俄鋁來港上市，不過只向高端投資者發售，一手要成20萬元，入場費要100萬元，好多人都話貴，金占士就翻查全港股票嘅入場費，發覺若以一手計，俄鋁真係貴咗成條街。以尋日收市價計算，除咗藍籌股新地（00016）入場費要11.4萬元，仲有一隻更厲害，入場費要成13.7萬元，原來就係中國大冶優先股（00421）。
藍籌僅新地逾10萬
中國大冶優先股尋日收市價報137.8元，以一手1,000股計算，要13.7萬元先可買到一手，不過呢隻股近幾個月都冇成交。其他好似醫藥股威高股份（08199），一手4,000股，以收市價26.9元計，買一手要10.7萬元，算係創業板中最貴入場費嘅股份。另外，安徽海螺（00914）及青啤（00168）尋日分別收報49元及41.6元，兩隻股份每手股數同為2,000股，所以要投資9.8萬及8.3萬元才買到一手。
金占士數來數去，超過10萬蚊嘅藍籌股只有新地，而較「近磅」嘅係長實（00001）（一手入場費9.79萬元）。至於滙控（00005）入場費只需3.54萬元，如果港交所（00388）冇拆完再拆（一手由2,000股變500股，再變為100股），就係唯一可同俄鋁匹敵嘅股份。
金占士